தமிழ்நாட்டில் ஆசிரியர் பணிப்பாதுகாப்பு சட்டம் நிறைவேற்றவும் நாடாளுமன்றத்தில் TET தகுதித் தேர்வு விலக்களித்து சட்டதிருத்தம் செய்யவும் கோரி தேசிய ஆசிரியர் சங்க பொதுக்குழு தீர்மானம்!!!
தேசிய ஆசிரியர் சங்கம் தமிழ்நாடு சார்பாக மாநில பொதுக் குழுக்கூட்டம் விருதுநகர் மாவட்டம் ராஜபாளையத்தில்(27-09-26 அன்று) சிறப்புடன் நடைபெற்றது.
மாநிலத் தலைவர் திரு. திரிலோக சந்திரன் அவர்கள் விழாவினை துவக்கி வைத்து, சங்க செயல்பாடு, சங்க இலட்சியம் மற்றும் சங்க இலக்குகள் குறித்து எடுத்துரைத்தார்.
விருதுநகர் மாவட்ட செயலாளர் திரு. சரவண செல்வன் அவர்கள் அனைவரையும் வரவேற்றார்
மாநில பொதுச் செயலாளர் திரு. கந்தசாமி அவர்கள் தீர்மானங்கள் குறித்தும் , செய்ய வேண்டிய சங்கப் பணிகள் குறித்தும் வாழ்வியல் திறன் விழுமியக்கல்வி கற்பிக்க வேண்டியதன் அவசியம் குறித்தும் எடுத்துரைத்தார்.
சங்க வளர்ச்சிக்கான ஆலோசனைகளை மாநில மகளிர் அணிச் செயலாளர் திருமதி. சாருமதி தேவி அவர்கள் எடுத்துரைத்தார்.
கூட்டத்தில் கீழ்க்கண்ட தீர்மானங்கள் நிறைவேற்றப்பட்டன
1. ஆசிரியர் பணி பாதுகாப்புச் சட்டத்தை உடனடியாக வரும் சட்டமன்ற கூட்டத்தில் நிறைவேற்றும்படி இப் பொதுக்குழு தமிழக அரசை கேட்டுக்கொள்கிறது
2. பணியில் உள்ள 2012 க்கு முன் நியமிக்கப்பட்ட மூத்த ஆசிரியர்களுக்கு ஆசிரியர் தகுதி தேர்வில் இருந்து விலக்கு அளிக்கும் சட்ட திருத்த மசோதாவை உடனடியாக நிறைவேற்ற பொதுக் குழு மத்திய அரசை கேட்டுக் கொள்கிறது .
3. தேர்தல் காலத்தில் வழங்கிய வாக்குறுதியின் படி TAPS திட்டத்தை முற்றிலும் கைவிட்டு பழைய ஓய்வூதியத் திட்டத்தை கனிவுடன் பரிசீலித்து ஆணை வழங்கிட வேண்டும்
4. ஆசிரியர் பொது மாறுதல் கலந்தாய்வு நடைபெற தடையாக உள்ள வழக்குகளை விரைந்து தீர்வு காண வேண்டும்
5. சிறுபான்மையற்ற அரசு நிதி உதவிப் பெறும் பள்ளிகளில் ஆசிரியர் தகுதித் தேர்வு முடித்த பின்னரும் நிரந்தர ஆசிரியர்களுக்கு பணியில் சேர்ந்த நாள் முதல் வழங்கப்படாமல் நிறுத்தி வைக்கப்பட்டிருந்த ஆண்டு ஊக்க ஊதியம், வளரூதியம் உள்ளிட்ட அனைத்து பணப் பலன்களும் உடனடியாக வழங்க உரிய செயல்முறைகளை வெளியிட வேண்டும்
6. தமிழகத்தில் அனைத்து மாவட்டங்களிலும் ஜவகர் நவோதயா பள்ளிகளை மத்திய அரசு நடத்த உடனடியாக இட வசதி வழங்கி ஏழை மாணவர்கள் பயன்பெறச்செய்ய வேண்டும்
7. மூத்த இடைநிலை ஆசிரியர்களுக்கான ஆண்டு ஊதிய உயர்வு *PAY MATRIX* நீட்டிப்பு செய்து அரசாணை வெளியிட வேண்டும்
8. அரசு ஊழியர்கள் ஆசிரியர்களுக்கு தற்சமயம் நடைமுறையில் உள்ள மருத்துவக் காப்பீடு மறுபரிசீலனை செய்யப்பட்டு 100% மருத்துவ செலவினம் கட்டணமில்லா சிகிச்சை பெறும் வகையில் மாற்றப்பட வேண்டும். மருத்துவக்காப்பீடு திட்டத்தில் இணைவது அரசு ஊழியர் விருப்பம் சார்ந்ததாக இருக்க வேண்டும்.
9. காலை சிற்றுண்டி திட்டத்தை 6-8 வகுப்புகளுக்கு விரிவுபடுத்தியமைக்கும், காலை மற்றும் மாலை வேளைகளில் பள்ளி மாணவர்களுக்கு சிறப்பு பேருந்துகள் இயக்க நடவடிக்கை எடுத்து வருவதற்கும் பள்ளிகளின் மின்சார தேவைகளுக்கு சோலார் பேனல் அமைக்க முயற்சி மேற்கொண்டு வருவதற்கும் தமிழ்நாடு அரசுக்கும் பள்ளிக்கல்வி துறைக்கும் மனமார்ந்த நன்றிகளை இப்பொதுக்குழு தெரிவிக்கிறது.
10. காலை உணவு திட்டத்தைக் கண்காணிக்கும் பணிக்கு தனியாக பணியாளர்களை நியமித்திட வேண்டும் ஆசிரியர்கள் மீது பல்வேறு பணிகளை திணித்து மாணவர்களுக்கு கற்பித்தல் நேரத்தை குறைத்து மாணவர்கள் திறமை வளர்க்க தடையாக இருக்க வேண்டாம் என தமிழ்நாடு அரசை இப்பொதுக்குழு வலியுறுத்துகிறது.
11. ஆசிரியர் தேர்வு வாரியம் நடத்திய போட்டித்தேர்வு மூலம் தேர்ந்தெடுக்கப்பட்ட ஆசிரியர் பயிற்றுநர்களுக்கு (BRTE)பணி வரன்முறை தனியாக தேவை இல்லை என்ற ஆணையினை பணிப்பதிவேட்டில் பதிவு செய்ய மாநில திட்ட இயக்குனர் நடவடிக்கை எடுக்க வேண்டும்.
கூட்டத்தில் மாநில மாவட்ட நிர்வாகிகள் கலந்து கொண்டனர்
பொதுக்குழு ஏற்பாடுகளை விருதுநகர் மாவட்ட நிர்வாகிகள் மாநில துணைத்தலைவர் திரு விஜய் தலைமையில் செய்திருந்தனர்.
No comments:
Post a Comment